વધુ પડતી પેઇનકિલર કિડની ફેલ કરી શકે છે: CDSCOની ચેતવણી
સેન્ટ્રલ ડ્રગ સ્ટાન્ડર્ડ કંટ્રોલ ઓર્ગેનાઇઝેશન (CDSCO) દ્વારા ડૉક્ટરની સલાહ વગર લાંબા સમય સુધી પેઇનકિલર લેવા સામે ચેતવણી આપવામાં આવી છે. આ પ્રકારની બેદરકારીથી કિડની ફેલ થવાનું જોખમ રહે છે અને યુવાનોમાં પણ આવા કેસો વધી રહ્યા છે.
ડૉક્ટરની સલાહ વિના જાતે પેઇનકિલર લેવાની ટેવ બની શકે છે જોખમી; CDSCO એ કિડની ફેલ થવા અંગે આપી લાલબત્તી
સામાન્ય દુખાવામાં પણ ડૉક્ટરની સલાહ લીધા વિના પોતાની જાતે પેઇનકિલર (દર્દશામક દવાઓ) ગળી જવાની આદત લોકોના સ્વાસ્થ્ય માટે ભારે પડી શકે છે. સેન્ટ્રલ ડ્રગ સ્ટાન્ડર્ડ કંટ્રોલ ઓર્ગેનાઇઝેશન (CDSCO) એ તાજેતરમાં ડૉક્ટરની પરામર્શ વિના લાંબા સમય સુધી પેઇનકિલર દવાઓ લેવા સામે ગંભીર ચેતવણી જાહેર કરી છે.
નિષ્ણાતોના જણાવ્યા અનુસાર, કોઈપણ માર્ગદર્શન વગર વારંવાર દર્દશામક દવાઓ લેવાથી 'ક્રોનિક કિડની ડિસિઝ' (Chronic Kidney Disease) થઈ શકે છે અને કેટલાક ગંભીર કિસ્સાઓમાં દર્દીની કિડની સંપૂર્ણપણે ફેલ પણ થઈ શકે છે.
હાલના સમયમાં આ આદતને કારણે યુવાનોમાં પણ કિડની ફેલ થવાના કેસોમાં ચિંતાજનક વધારો નોંધાઈ રહ્યો છે. કિડની ગંભીર રીતે પ્રભાવિત થતાં ઘણા દર્દીઓને ડાયાલિસિસ કરાવવાની ફરજ પડી રહી છે. તેથી, નિષ્ણાતો સલાહ આપે છે કે કોઈપણ પ્રકારના દુખાવા માટે જાતે દવાઓ લેવાના બદલે તાત્કાલિક યોગ્ય તબીબી તપાસ કરાવી સલાહ અનુસાર જ દવાઓ લેવી જોઈએ.
