ગાંધીનગર : રાજ્યમાં ભ્રષ્ટાચારના નિર્મૂળ અને વહીવટી તંત્રમાં પારદર્શિતા લાવવાના હેતુથી ગુજરાત સરકારના ગૃહ વિભાગ દ્વારા આવતીકાલ તા. ૩૧ ઓક્ટોબર, ૨૦૨૬થી તા. ૭ નવેમ્બર, ૨૦૨૬ સુધી ‘સતર્કતા જાગૃતિ સપ્તાહ-૨૦૨૬’ની ઉજવણી કરવામાં આવશે. આ વર્ષની મુખ્ય થીમ ‘Probity for Prosperity –સત્યનિષ્ઠાથી સમૃદ્ધિ’ રાખવામાં આવી છે.આ સપ્તાહની ઉજવણીનો મુખ્ય હેતુ સમાજમાં પ્રમાણિકતા, નૈતિક મૂલ્યો, જવાબદારી અને સક્રિય નાગરિકતાની ભાવનાને પ્રોત્સાહન આપવાનો છે. આ અભિયાન અંતર્ગત રાજ્યના તમામ સરકારી વિભાગો, ખાતાના વડાઓ, બોર્ડ-નિગમો, જાહેર સાહસો તેમજ સ્થાનિક સ્વરાજ્યની સંસ્થાઓ દ્વારા વિવિધ જાગૃતિ કાર્યક્રમોનું આયોજન કરવામાં આવશે.આ અભિયાનના ભાગરૂપે આગામી તા. ૨ નવેમ્બર, ૨૦૨૬ના રોજ સવારે ૧૧:૦૦ કલાકે રાજ્યભરના સરકારી અધિકારીઓ અને કર્મચારીઓ દ્વારા ફરજ પ્રત્યે નિષ્ઠા અને સત્યનિષ્ઠાના શપથ લેવામાં આવશે. આ સાથે સામાન્ય નાગરિકોને પણ આ પ્રતિજ્ઞામાં જોડાવા માટે પ્રોત્સાહિત કરવામાં આવશેનાગરિકો સેન્ટ્રલ વિજિલન્સ કમિશન (CVC)ની સત્તાવાર વેબસાઈટ પર જઈને ઓનલાઈન ઈ-પ્રતિજ્ઞા લઈ શકશે. આ ઉપરાંત વિવિધ સરકારી સંસ્થાઓમાં નિવારક સતર્કતા, નૈતિક વહીવટ અને ભ્રષ્ટાચાર નિવારણ અંગે ચર્ચાસત્રો, કાર્યશાળાઓ તથા જાગૃતિ કાર્યક્રમો યોજાશે.યુવાનો અને કર્મચારીઓમાં ભ્રષ્ટાચાર સામે જાગૃતિ વધે તે માટે ક્વિઝ, ચર્ચા-વિચારણા, નિબંધ અને અન્ય રચનાત્મક સ્પર્ધાઓનું પણ આયોજન કરવામાં આવ્યું છે. જ્યારે ગ્રામ્ય અને અર્ધશહેરી વિસ્તારોમાં નાગરિકોની ભાગીદારી વધારવા વોકથોન, મેરેથોન, શેરી નાટકો અને જાગૃતિ ગ્રામસભાઓ યોજાશે.

આ ઉપરાંત રંગોળી, પોસ્ટર મેકિંગ, લોકસાહિત્ય અને પપેટ શૉ જેવા માધ્યમો દ્વારા ભ્રષ્ટાચાર વિરોધી સંદેશો લોકો સુધી પહોંચાડવામાં આવશે. સોશિયલ મીડિયા, બલ્ક એસએમએસ, ઈ-મેઈલ અને વોટ્સએપનો ઉપયોગ કરીને પણ આ અભિયાનને વધુ વ્યાપક બનાવવામાં આવશે. સેન્ટ્રલ વિજિલન્સ કમિશનનાં સોશિયલ મીડિયા હેન્ડલ્સને ટેગ કરીને નાગરિકોની લોકભાગીદારી વધારવા પર પણ ભાર મૂકવામાં આવ્યો છેસતર્કતા જાગૃતિ સપ્તાહનો મુખ્ય સંદેશ એ છે કે ભ્રષ્ટાચાર નિવારણ માત્ર સરકારી તંત્રની જવાબદારી નથી, પરંતુ તેમાં દરેક નાગરિકની સક્રિય ભાગીદારી અને સત્યનિષ્ઠા પણ એટલી જ જરૂરી છે.