નર્મદા/ગાંધીનગર:

જાહેર બાંધકામોમાં નબળી ગુણવત્તા અને ભ્રષ્ટાચાર સામે ગુજરાત સરકારે કડક વલણ અપનાવ્યું છે. નર્મદા જિલ્લાના રાજપીપળા-રામગઢ (નવાગામ) રોડ પર કરજણ નદી ઉપર બનેલા મેજર બ્રિજના બાંધકામમાં ગંભીર બેદરકારી સામે આવતા મુખ્યમંત્રી શ્રી ભૂપેન્દ્ર પટેલે આકરું વલણ અપનાવી સંબંધિત કોન્ટ્રાક્ટર સામે ફોજદારી કાર્યવાહી કરવા આદેશ આપ્યો છે. આ સૂચનાના આધારે માર્ગ અને મકાન વિભાગ દ્વારા સુરત સ્થિત એજન્સી સામે રાજપીપળા પોલીસ સ્ટેશનમાં એફઆઈઆર (FIR) દાખલ કરવામાં આવી છે.

​૧૦.૭૧ કરોડના ખર્ચે બન્યો હતો બ્રિજ

માર્ગ અને મકાન વિભાગ દ્વારા કરજણ નદી પરના આ મહત્વપૂર્ણ બ્રિજનું કામ વર્ષ ૨૦૧૮-૧૯ દરમિયાન મેસર્સ રોયલ ઇન્ફ્રા એન્જિનિયરિંગ પ્રા. લિ. (સુરત)ને સોંપવામાં આવ્યું હતું. આશરે ₹૧૦.૭૧ કરોડના ટેન્ડર ખર્ચે ૧૫ સપ્ટેમ્બર ૨૦૧૮ના રોજ શરૂ થયેલું આ બાંધકામ ૧૪ ઓગસ્ટ ૨૦૨૦ના રોજ પૂરું થયું હતું. જોકે, ટૂંકા ગાળામાં જ બ્રિજની કામગીરી શંકાના દાયરામાં આવી ગઈ હતી.

​તપાસમાં પાયો બેસી ગયો હોવાનું ખૂલ્યું

વિભાગ દ્વારા હાથ ધરાયેલી ચકાસણી દરમિયાન બ્રિજનું એક ફાઉન્ડેશન સેટલ (બેસી ગયું) હોવાનું સામે આવ્યું હતું. આ પ્રાથમિક ખામી બાદ ક્વોલિટી કંટ્રોલ પ્રભાગ દ્વારા સમગ્ર બ્રિજનું સંપૂર્ણ ટેકનિકલ પરીક્ષણ કરવામાં આવતાં અન્ય ભાગોમાં પણ ગંભીર બાંધકામ ક્ષતિઓ મળી આવી હતી. પુલ વાહનવ્યવહાર માટે જોખમી અને અસુરક્ષિત જણાતા તંત્રને તાત્કાલિક અસરથી તેના પર વાહનવ્યવહાર બંધ કરવાની ફરજ પડી હતી.

​અધિકારીઓ સામે પણ શિસ્તભંગના પગલાં

જાહેર જનતાની સલામતી સાથે થયેલા ચેડાંને ગંભીરતાથી લઈને મુખ્યમંત્રીએ કોન્ટ્રાક્ટર એજન્સી અને તેના પ્રતિનિધિઓ સામે તાત્કાલિક પોલીસ ફરિયાદ નોંધાવવા નિર્દેશ આપ્યા હતા. આ ઉપરાંત, બાંધકામની દેખરેખમાં બેદરકારી દાખવનાર સંબંધિત અધિકારીઓ અને કર્મચારીઓ સામે પણ ગુજરાત રાજ્ય સેવા (શિસ્ત અને અપીલ) નિયમો, ૧૯૭૧ હેઠળ ખાતાકીય તપાસ અને કડક દંડાત્મક કાર્યવાહી હાથ ધરવાના આદેશ જારી કરાયા છે.

​રાજ્ય સરકારના આ નિર્ણયથી સ્પષ્ટ સંદેશ ગયો છે કે જાહેર વિકાસ કાર્યોમાં કામચોરી કે નબળી ગુણવત્તા કોઈપણ સંજોગોમાં ચલાવી લેવામાં આવશે નહી